Orrù atacat su Sardegna Pride “Carrasegare”. Su MOS “Ignorante”

De Massimo Mele su 12 Làmpadas 2014. manco unu cummentu

“Non creo de m’isballiare si cuscuro chi su Gay Pride in s’Alighera at a èssere sa sòlita genia de carrasegare“. Marcello Orrù, cussigeri regionale de su Psd’Az imbiat a sos giornales una lìtera de fogu in pitzus de su Sardegna Pride programmadu in s’Alighera su 28 de làmpadas chi benit.

Anteponende de “no èssere omòfobu” ma simplemente unu chi cheret defensare sa famìlia traditzionale dae sos atacos suprios, Orrù cundennat su documentu polìticu de su Pride chi, segundu isse, “mira a eliminare la famiglia tradizionale dal welfare del nostro Paese.” Buzurru meda s’agabbu subra su perìgulu de sas “campagnas gender” in sas iscolas chi ammèriant a interrare sas raighinas cristianas e sa Traditzione de s’Europa.”

“Su Pride una genia de carrasegare? Nono, est una manifestada polìtica, cun una prataforma rivendicativa importante chi podet èssere resumida in sa pretesa de sa prena tzitadinàntzia pro totus e totas. Ma polìtica e festa, in su Pride, no sunt ispartzighinàbiles: su gosu e s’allegria de una festa colletiva contra su cinixali e sa tristura de s’òdiu e de sa discriminatzione”. A respòndere est su MOS, l’assòtziu chi si òcupat de s’aparitzamentu de su Pride. “Pro nois su Pride est un momentu de liberatzione e de gosu chi iscantzellat cussu sentimentu de birgòngia e de inadecuadesa chi sa cultura etero-sessista nos imponet dae giovanìssimos.”

In pitzus de su presumidu atacu a sa famìlia traditzionale, su MOS si nde befat: “Non semus tzertos de àere cumpresu, o fortzis non b’aiat nudda de cumprèndere.” A pustis pretzisat: “Comentesisiat s’estensione de unu deretu a chie nd’est isbrìsciu, no nde bogat nudda a chie cussu deretu giai lu tenet.”

“No ischimus ite signìficat “campagna gender”, nois preferimus chistionare de educatzione a una cultura de su respetu e de sas diferèntzias e de curreta informatzione subra sos protzessos de formatzione de s’identidade sessuale.” Concruit su MOS: “Nos permitimus de cumbidare su cussigeri a partetzipare a unu de sos addòbios chi aparitzamus in sas iscolas pro evitare, in su benidore, de nàrrere meda machines gasi in pitzus de cosas chi, tantecantu, non connoschet.”

Custa publicatzione est disponìbile fintzas in: Italian